AGI LITERARY WORKSHOP 2019

Ang Pag-ampo sa Gugma Alang sa Tanan

(ni Boni Quirog, Hunyo 5, 2015)

Hinaut nga ang tanan mapuno sa kalipay ug kalinaw
Hinaut nga ang tanan, hain man,
Kusgan o mahuyang
Ang daku ug ang gamay
Ang gamhanan o dili
Ang mubo ug ang taas
Ang hanap ug ang tataw:
Tanan bisan diin
Ang makita ug dili makita
Ang duol ug halayo
Ang miabut na o padulong pa:
Hinaut nga tanan mapuno sa malungtarong kalipay.
Ayaw linglaha ang isig-ka-tawo
Ayaw pagbaton og kayugot
Ayaw tungloha ang isig-ka-ingon
Tungod sa kasilag o kasuko.
Sama sa usa ka inahan nga mihalad sa kaugalingon
Pagpanalipud sa bugtong anak
Patuboa diha kanimo
Ang gugmang way-kinutuban alang sa tanan.
Ipadagayday ang gugma diha sa kalibutan
Ngadto sa kawanangan ug kinahiladman
Gugmang walay kinutuban, kasilag o pagdumot.
Og sa imong pagbarug ug paglakaw
Paglingkod ug paghigda
Hangtud nga ikaw nagtukaw
Paningkamuti kini sa imong kasingkasing
Ug makab-ot mo ang langit dinhi sa yuta.
Kini atong iampo sa Ginoo nga atong Dios, Amen.

Usa ka Pag-ampo

Hinaut unta nga malamdagan sa Langitnong Kahayag ang mga tanlag (konsensya) sa mga dagkung negosyante, mga politiko, mga manlalaban (abogado), mga taga-gobyerno, ug tanang nakigkonsabo (lokal ug langyaw) sa pagmina sa kabukiran ug pag-pamutol og kahoy sa Mindanao! Hinaut nga makabisita sila sa Cagayan de Oro ug Iligan aron makatabang. Hinaut pa unta.

[Kaliwat ni Karyapa]

TAMBAG NI RUDOLF STEINER

Kinahanglan atong papason
Gikan sa kalag
Tanang kahadlok ug kalisang sa mga umaabot kanato
Gikan sa kaugmaon.
Kinahanglan makaangkon kita sa kalinaw
Sa tanang gibati ug pagbati
Mahitungod sa kaugmaon.
Kinahanglan molantaw kita sa unahan
Nga may hingpit nga masaligong pagdawat
Sa tanang umaabot.
Ug kinahanglan hunahunaon lamang nato
Nga bisan unsa ang moabut
Kini hinatag kanato
Sa giya ning kalibutan nga tugob sa kaalam.
Kini tipik sa atong kinahanglang makat-onan niining panahona,
Diin
Kita magpakabuhi diha sa tiunay’ng pagsalig
Nga walay bisan unsang kasigurohan sa pagpakabuhi.
Salig sa makanunayong panabang
Sa ispirituhanong kalibutan.
Sa pagkatinuod, wa na’y laing mapuslan pa
Kon ang atong kaisug dili magpakyas kanato.
Ug atong pangitaon ang kaamguhan
Gikan sa atong kinahiladman,
Matag buntag ug gabii.

Boni Quirog
27 December 2010

Ang Unang Pagtuki

lunsay pa sa landay nga bulawan
ang pagbati sa usa ka bata nga buto
nga daw ang hamabaw nga kalipay
lang ang tiunay'ng pangandoy

apan subo nga pamati kung ang
katagbawan niining kalipay
mao ang tinguhang
unodnon

di na ikalimud
ang wa'y hanaw
sa tago nagtuki
sa pagtagbaw
sa lawasnong urog

unodnon
lawasnon
kalipay ug agulo
sa kalit nga
natagamtaman

sinulat ni tamtam

ARTE SA PAGPANGIHI

Bisan sa pagpangihi
adunay arte.
Ang mga laki
labi na sa syudad
mangihi sa pader
ilaybog-laybog,
magbadlis-badlis
og mga letra,
magdibuho’g kasingkasing
ug uban pa’ng porma.
Pagkahuman,
magkurog-kurog
ang abaga
sama sa sayaw
nga binag-o.
Ang mga baje
sa kabaryohan,
kung tigulang
magpasalipud lang
sa punuan sa saging.
Bisa’g magtindog
mahimo na.
Magbakaang lang
ug alsahon la’g d’yutay
ang saja.
Apan kung batan-on,
sa syudad man o sa bukid,
dili mahimo’g bisa’g asa
kay basi’g ukyon.
Daghan pa tingale’y
uba’ng paagi
ug laing arte
sa pagpangihi.


(Boni Quirog, December 2008)

Aning Luyong

Nangunot na ang nawong. Usahay manglipaghong. Singkit nga mga mata gi-anteojosan na. Ang buhok kinolora’g bughaw dapit sa iyang buna. Mopahiyom siya’g panagsa, samtang nag-asoy sa giatubang nga kiha. Kinadak-an iyang basak didto sa ila. May binuhing manok, baboy, ug baka. Wa gyud maglisud kay tulo ka anak tua sa laing nasud. Kalingawan niya paghimo’g saging ug bolanghoyng maruya, sa tunghaang elementarya didto ipamaligya. Marso 9, 2005 usa ka gatus ug katloan ka bata nangahilo. Nangamatay ang kawhaan ug pito. Siya gipasanginlan nga mao’y sad-an. Wa siya moangkon, busa ang kaso nagpadayon. Mipapel ang mga politico sa bag-o pa ang trahedya. Midugok usab ang daghang taga-media. Uso sa ilang dapit ang kemikal nga kasangkapan alang sa tanaman ug mga kahayupan. Daghang sugilanon, managlahing bersyon. Hasta bolanghoy gihimong kontrabida. Bisan sa Internet karon atong mabasa.

ni Boni Quirog